- 生存需要單車，生活需要有車。無車都可以坐新幹線穿州過省，呢度最值得自豪嘅，就係有個のぞみ會停嘅新幹線站，一程車可以去到博多/廣島/岡山/大阪/名古屋/東京

- 地產地消推行得幾好，係市內外食嘅話80%都係山口食材，其他都係鄰近九州/廣島嘅食材。意外地全部都好好食，無出現過「因為食慣北海道食材而覺得其他地方嘅野唔好食」的落差。不過真係飲得出水喉水同北海道嘅唔同（本州啲水硬度高）

- 承上，居酒屋店舖好豐富，小店都好多，反而連鎖店就少。無サイゼリヤ，domino係最近先開，pizza hut 兩星期前係隔離市開張了…m記同kfc都係個山腳度（好彩係近我屋企），變相好少自己出去食飯，公司飲み会先會外食

- 外國嘅餐廳都好少選擇。連中華餐廳都無幾間，就知山口県係幾咁狗也不屌嘅僻地。印度餐廳都少，我嚟到山口無食過咖哩…

- 好多超級市場…有平有貴，未買車嘅時候，距離上只可以去比較貴嘅地方買餸。有車之後會揸去平嘅地方買，而且開24hr，去完trip返嚟都隨時隨可以買餸

- 市內大型U記2022年大裝修，2024年春先開返業…連U記都無得行嘅時候，都係通販為主（用多左zozotown...），或者揸車去第二度買/睇衫。県內嘅select shop都好廢，但又唔知點解賣到好貴…（貴，從來都唔係佢問題，係我問題）

- 有啲想摸上手先買嘅野，我會去event時順便係東京大阪解決，細件就即場買，大件就通販。（搞到屋企好多紙箱）

- Biccamera，Yodobashi 當然都冇。以前係札幌就成日行，依家得Yamada電機/Ed on。低一檔次嘅豐澤/百老匯咁上下level，要買最新家電都係要靠通販。好在家電呢啲唔係high rotation嘅物品…

- 傢私都係ニトリ/通販。無IKEA。但IKEA傢私係日本搬屋普遍上都有啲kam野，唔係長住日本人都唔會建議買IKEA。

- 百貨公司，冇，AEON Mall，冇。県内無普世間「AEON Mall」果種規模嘅集合型商場，就算係集合型商場，都係得啲細舖進駐，天水圍嘉湖銀座咁上下level。下関有大丸百貨，但裡面啲舖頭同我認識嘅大丸又差一截

- 戲院，要去隔離市。呢一點仲廢過嘉湖銀座。

- 銀行…我Main bank用三井住友銀行。山口県三井住友銀行支店只有下関支店，距離屋企百幾公里，市內更加冇三井住友atm。好彩2年前三井住友同三菱打通咗可以atm免手續費，否則真係要全面cashless (雖然依家都好少用cash)

- 有2個細機場。宇部空港/岩国機場。規模比仙台空港再細少少。兩邊同我嘅距離都一樣，10月開始去東京event我唔搭新幹線（單程4個鐘太折磨），選擇揸車去宇部再飛羽田，因為宇部機場泊車唔洗錢，而岩国要拎機票去換泊車券…

總結，生活好平淡，雖然充滿住悶死嘅條件，但其實都唔會悶死。山口県過嘅一定唔係普世香港人嚮往嘅「日本生活」，但接納到咁平淡嘅日子其實都幾舒適。對我嚟講真係要有部車，放假日子兜一兜出去市外轉換心情。

唔轉工又唔扭計嘅話，應該仲有好長好長時間留係度。係時候諗定5年後換咩車。