純粹按照香港統計處嘅數據，由2019年中到2021年中兩年裏面，撇除單程證人口輸入嘅數字，香港淨流失咗13.75萬人 (圖1)。流出人口要再喺呢個數字加上流入香港嘅人口。統計處冇分番開嘅數字。但參考入境處出入境數字，過去兩年每日出境人數經常約為入境人數兩倍 (由於入境處數字以每日計算，要準確計算太繁複，所以只粗略咁撳入去十個唔同嘅日期作參考），粗略估計兩年裏面走咗可能約25萬人 (即估計11, 12萬非單程證人口流入香港)。

但究竟喺呢廿幾萬走咗嘅人裏面有幾多係後生仔年青人呢?

我哋可以睇睇另一個圖表 (圖2) 。兩年裏面 (2019年中至2021年中) 按年齡人口變化可以從統計處提供嘅過去3年按年齡人口數字計算出來。圖最右一行，p(x) – p(x-2) 係計算出來嘅數字。同一個人，2021年時佢係10歲，2019年時佢就係8歲。兩數相減，可知按年齡人口變化情況。

如果睇15至25歲嘅人口 (按2021年計)，其實人口唔係減少咗好多，只係減少咗1.93萬。要留意呢個數字係已經混合咗 流出、流入、單程證、同自然死亡嘅數字。單程證人口照計傾向小朋友年青人居多，所以會令到小朋友年青人淨流出數字減少。不過可以參考返圖一，過去兩年因為疫情緣故，單程證人數係大大減少咗，亦可以假設呢個年齡層自然死亡嘅人數好少。所以可以估計 (按流出流入係二比一嘅比例計)呢個年齡層起碼有三萬人走咗。

而喺呢個年齡層裏面, 有一個年紀特別流失得多嘅, 就係21歲 – 有4千6百人。呢啲人好可能係因為大學一畢業就選擇離開香港。2021年，21歲嘅人其實只有 6.07 萬人。如果考慮呢個係淨流失人口嘅數字，有可能走咗嘅人佔呢個年紀嘅十分一人口 (~6, 7千人) 。對於呢個年紀嘅人嚟講，好可能佢每認識十個人裏面就有一個移民離開香港，所以感覺上係會有好多人離開咗 。

一個有趣現象係，原來過去兩年 50歲以上減少嘅人口，平均嚟講仲多。當然年紀越大好可能係因為自然死亡而減少人口。但呢兩年嘅死亡人口其實總數只係9.93萬人，比起由51歲以上減少嘅人口總數 (26.01萬人)，起碼有16萬人唔係因為死亡而唔見咗。其實一直以嚟，年長嘅港人移居內地退休係一個趨勢。參考勞工及福利局數字，2019年年中，已有約53.8萬名香港永久居民經常在廣東省生活。所以實際數字上其實好可能移居內地比起移居外國嘅人數仲要多。可能只係因為年長人口基數大，而且移居內地嘅人好可能會經常往來，感覺上冇離開香港。不過統計處冇公佈呢方面嘅數字作準確對比。

但相對於26至35歲嘅人幾乎冇乜減少到，由40歲左右嘅年紀，減少嘅人口開始穩步上升，尤其係去到51-56歲流失嘅人口係另一個高峰。呢度有幾多係同埋仔女移居外國嘅人呢？

最後一個發現。呢兩年嘅出生率係急劇下降 。2021年出生人口已經降到得返3萬幾。比起十年前仲有6萬幾，30年前有10萬以上，呢個可能先至係長遠會導致香港人口減少更為值得關注嘅問題。

=============================================

結果這數據出來跟不論是民研的調查， 或是主流輿論都不太相符

但這數據跟本人的現實生活還算相符，當然本人的同溫層都算是堅厚的